Category: Uncategorized @gd

Nollaig Chridheil agus Bliadhna Mhath Ùr bho sgioba Acair air fad!

Meal do naidheachd do Alexander ann an Clas 6B aig Sgoil Ghàidhlig Ghlaschu a bhuannaich a’ cho-fharpais Cairt Nollaig againn agus abair gun do chruthaich e cairt shnog dhuinn! Gheibh an clas aige £50 de leabhraichean Acair mar dhuais!

Bidh oifis Acair a’ dùnadh aig 2f air Dihaoine 22.12 agus a’ fosgladh aig 9m air 03.01.2024. Ma tha sibh airson leabhraichean a thogail, feuch gun tig sibh a-steach mus dùin sinn Dihaoine. 

Fhuair sinn an cothrom a dhol a-mach gu biadh an t-seachdain sa gus àm na Nollaig a chomharrachadh còmhla. Tha sinn uile a’ guidhe Nollaig Chridheil dhuibh gu leìr agus sinn air leth taingeil dhuibh airson ur cuid taic, coibhneas agus càirdeas thar a’ bhliadhna a dh’ fhalbh.

Tha bliadhna shoirbheachail air a bhith againn aig Acair agus sinn an dòchas gun còrd na tha ri thighinn ann an 2024 ribh uile cuideachd! Cumaibh sùil a-mach sa bhliadhn’ ùr airson naidheachdan mu na tha fainear dhuinn! 

Tha Acair air leth duilich cluinntinn gu bheil an Dotair Fionnlagh MacLeòid air bàsachadh. Bha Fionnlagh gu mòr an-sàs ann a bhith a’ cur air bhog Acair bho thùs ann an 1977. Bha e ag obair aig Comhairle nan Eilean aig an àm agus nuair a thàinig am Pròiseact Foghlam Dà-chànanach gu buil bha e follaiseach gu robh feum aig sgoiltean air leabhraichean Gàidhlig. Bha Fionnlagh an-sàs ann an toiseach-tòiseachaidh Acair agus ‘s iomadh taic a thug e seachad dhuinn bhon uair sin.

Dh’fhoillsich Acair feadhainn dha na leabhraichean aig Fionnlagh fhèin, nam measg Rònan agus Brianuilt, The Chapels and Healing Wells of the Western Isles, Muilnean Beaga Leòdhais/The Norse Mills of Lewis agus Mac an t-Srònaich. Cuideachd, chuir e seachad iomadach bliadhna air Bòrd Acair.

‘S e dlùth-charaid dha Acair a bh’anns an Dr Fionnlagh Macleòid. Tha gach neach an luib Acair, an-dràsta agus thar nam bliadhnaichean a dh’ fhalbh, a’ smaoineachadh air teaghlach Fhionnlaigh, Norma, Rachel agus Ceit Anna, agus sinn a’ cuimhneachadh air le meas, nach gann.

Tha Acair uamhasach fhèin toilichte innse gu bheil trì leabhraichean Acair air an ainmeachadh air geàrr-liostaichean an Saltire Society airson Duaisean Leabhraichean Nàiseanta na h-Alba 2023.

Chaidh Crann-fìge | Fig Tree le Donnchadh MacGillÌosa ainmeachadh air a’ gheàrr-liosta airson duais leabhar ficsean.

Chaidh Crann-fige fhoillseachadh san t-Samhain an uiridh. ‘S e cruinneachadh de sgeulachdan ghoirid a th’ann, an dà chuid sa Ghàidhlig agus sa Bheurla, taobh seach taobh. Choisinn Donnchadh Duais Leabhar na Gàidhealtachd le Crann-fìge san Òg-mhìos agus Duais Chomuinn Gàidhealach Lunnainn airson an leabhar ficsein as fheàrr aig Na Duaisean Litreachais 2023 san t-Sultain.

Thuirt Donnchadh: “Tha mi air mo dhòigh gun deach Crann-fìge | Fig Tree ainmeachadh air a’ gheàrr-liosta airson Duaisean Saltire 2023. Tha e air a bhith na thogail dhomh gu bheil e air còrdadh ri uiread bhon a chaidh fhoillseachadh agus tha mi ‘n dòchas gu lean sin. Tha e miorbhaileach a bhith air a’ gheàrr-liosta airson an duais seo.”

Thuirt Aonghas Moireasdan, Manaidsear Acair: “Tha e na urram do dh’ Acair gu bheil Crann-fìge | Fig Tree air a’ gheàrr-liosta airson Duais Leabhar Ficsean aig Duaisean Leabhraichean Nàiseanta na h-Alba 2023. Tha an leabhar seo air a bhith air leth soirbheachail, a’ buannachadh Duais Leabhar na Gàidhealtachd 2023 agus cuideachd Duais Chomuinn Gàidhealach Lunnainn airson Leabhar Ficsean as Fheàrr aig Na Duaisean Litreachais 2023. Tha an sgrìobhadh aig Donnchadh sònraichte le blàths na sgrìobhadh nach urrainn ach faireachdainn. Tha an cruinneachadh seo air am foillseachadh gu dà-chànanach, leis a’ Ghàidhlig agus a’ Bheurla taobh seach taobh ‘s tha seo a’ ciallachadh gun tèid aig barrachd dhaoine air an tàlant aige a leughadh.”

 

Chaidh Cha Till Mise le Ruaraidh G MacIlleathain ainmeachadh air a’ gheàrr-liosta airson an duais Leabhar Rannsachaidh.

Chaidh Cha Till Mise fhoillseachadh san Iuchar 2022. Nuair a bha Ruaraidh G Macilleathain a’ fàs suas ann an Glaschu anns na seasgadan, chanadh a mhàthair ris gach 31 Dùbhlachd, ‘Chaidh Daibhidh a chall air na Russian Convoys’ – dìreach na faclan sin. B’ e co-ogha dha mhàthair a bha ann an Daibhidh. Bha e 22 bliadhna a dh’aois.

B’ e an aon fhiosrachadh a bha aig an teaghlach gun deach an soitheach aig Daibhidh, HMS Achates, fodha ann am Muir Bharents, 31 Dùbhlachd, 1942. Cha d’ fhuair iad a-mach a-riamh dè thachair dhan a’ bhalach òg à Bhatarnais san Eilean Sgitheanach. An deach a bhàthadh? An deach a mharbhadh le slige Ghearmailteach? Ach, a-nis, an dèidh rannsachadh agus thurchartasan iongantach, gabhaidh an sgeulachd aig Daibhidh innse.

Tha an leabhar seo ag innse ann an doimhneachd mu na cunnartan agus mun chruadal a dh’fhuiling seòladairean nan conbhoidhean dhan Ruis. Agus, mun ghaisgeachd a bha ri fhaicinn ann am Blàr Muir Bharents, a’ mhadainn ud ann an 1942.

Thuirt Ruaraidh: “’S e urram a th’ ann a bhith air a’ gheàrr-liosta airson Duais an Leabhar Rannsachaidh aig Duaisean Leabhar Nàiseanta na h-Alba 2023. Tha an urram seo cuideachd mar chomharra air an neart, an cruadal agus an spionnadh a bh’ aig an fheadhainn a bha an sàs anns na conbhoidhean seo eadar 1941-1945.”

Thuirt Aonghas Moireasdan, Manaidsear Acair: “Tha Acair air an dòigh gun deach Cha Till Mise ainmeachadh air a’ gheàrr-liosta airson duais an Leabhar Rannsachaidh aig Duaisean Leabhar Nàiseanta na h-Alba 2023! Tha Ruaraidh air obair, nach gann, a chur a-steach dhan leabhar seo leis an t-uamhas rannsachadh gus leabhar cho mionaideach seo a chruthachadh a tha ag innse na dh’ fhulaing na daoine seo. Fiosrachadh a tha air leth cudromach gu ar eachdraidh.”

 

Chaidh The Whalers of Harris le Ian Hart ainmeachadh air a’ gheàrr-liosta airson duais an Leabhar Eachdraidh.

Chaidh The Whalers of Harris fhoillseachadh san Lunastal 2022 agus e ag innse, ann an doimhneachd, mu eachdraidh stèisean sealg nam mucan-mara air cost’ an iar na Hearadh.

Anns an leabhar seo, a tha air a sgrùdadh gu grinn agus air a dheagh dhealbhachadh, tha an t-ùghdar, Ian Hart, ag innse sgeulachd a tha cuideachd a togail air cùisean-mhulaid agus an droch bhuaidh a bh’ aig a sin air saoghal nàdair. Chan e a-mhàin gu bheil e a’ toirt cunntas air eachdraidh nam mucan-mara sna Hearadh ach ‘s dòcha gu bheil e na rabhadh cuideachd gum bu chòir dhuinn dèiligeadh ris a’ phlanaid seo le barrachd co-fhaireachdainn, cùram agus tuigse.

Thuirt Ian: “Tha mi air leth toilichte cluinntinn gu bheil an leabhar agam The Whalers of Harris air a’ gheàrr-liosta airson Duais Leabhar Eachdraidh aig Duaisean Leabhraichean Nàiseanta na h-Alba 2023. Saoilidh mi gun do chuir an leabhar ri eachdraidh sòisealta, cultarail agus gnìomhachail na h-Alba agus na h-Eileanan Siar gu sònraichte. Tha e air a bhith na thlachd cuideachd a bhith ag obair còmhla ri taigh-foillseachaidh ionadail, Acair à Steòrnabhagh, a thug taic dhomh le bhith ga chruthachadh agus ga fhoillseachadh.”

Thuirt Aonghas Moireasdan, Manaidsear Acair: “Tha Acair air leth toilichte gu bheil The Whalers of Harris air a’ gheàrr-liosta airson Duais Leabhar Eachdraidh aig Duaisean Leabhraichean Nàiseanta na h-Alba 2023. Chan urrainnear luach eachdraidheil an leabhair seo a thomhas agus tha sinn air uamhasach toilichte gun deach sin aithneachadh agus e air a’ gheàrr-liosta airson na duais chliùiteach seo.”

 

“Tha e na urram mòr dhuinn an seo aig Acair nuair a thèid leabhraichean Acair an aithneachadh aig duaisean ach ‘s e urram nas motha buileach a th’ ann gun deach TRÌ leabhraichean Acair ainmeachadh air a’ gheàrr-liosta airson na duaisean chliùiteach seo. Tha seo na adhbhar brosnachaidh dhuinn uile agus dhan a h-uile foillseachair, ùghdar agus neach-leughaidh an luib saoghal foillseachaidh Gàidhlig. Tha sinn air ar ainmeachadh ri taobh leabhraichean Beurla agus tha sin na thogail dhuinn uile.”

“Cha bhiodh leabhraichean idir againn mur a biodh na h-ùghdaran a tha a’ sgrìobhadh na h-obraichean phrìseil seo no gu dearbh an taic a tha sinn a’ faighinn bho diofar bhuidhnean eile – leithid Comhairle nan Leabhraichean, Bòrd na Gàidhlig agus Alba Chruthachail.”

Gheibhear lorg air na leabhraichean air fad a bha air an ainmeachadh gu h-àrd air làrach lìn Acair – www.acairbooks.com

 

Bha oidhche shoirbheachail aig Acair oidhche ‘Haoine agus iad a’ cur air bhog leabhar ùr – Somhairle MacGill-Eain Na Bhriathran Fhèin.

Chaidh an tachartas a chumail aig Sabhal Mòr Ostaig ann an Slèite, mar phàirt den fhèis aca gus 50 bliadhna de Shabhal Mòr Ostaig a chomharrachadh.

Bha sluagh de dhaoine san èisteachd agus Mark Wringe a’ cur nan ceist air Jo NicDhòmhnail, Màiri Sìne Chaimbeul agus Iseabail NicGill-Eain – an triùir a dheasaich an leabhar prìseil seo.

Bha e an uairsin a’ bruidhinn ri Somhairle agus Gilleasbuig MacDhòmhnaill, oghaichean Shomhairle, mu na cuimhneachain aca air an duine sònraichte seo.

Na bhriathran fhèin, ann an Gàidhlig, tha am bàrd Somhairle MacGill-Eain a’ bruidhinn mu na daoine agus na h-àiteachan a thug buaidh air a bheatha agus a bhàrdachd. Tha e a’ bruidhinn air cànan, eachdraidh, poilitigs, cogadh agus gaol, cuspairean cudromach na bheatha. Tha an leabhar sònraichte seo stèidhichte air agallamhan a rinneadh leis san dàrna leth dhe bheatha, is e a’ beachdachadh air iomadh cuspair, nam measg na h-òrain agus a bhàrdachd a chuala e san teaghlach aige fhèin agus sa choimhearsnachd ann an Ratharsair agus san Eilean Sgitheanach.

Tha eisimpleirean dhiubh pailt san leabhar, mar a tha eisimpleirean den bhàrdachd aige fhèin. Tha iomadh dealbh ann de theaghlach Shomhairle, a shinnsearan, a cho-aoisean agus tachartasan aig an robh e, le dealbhan àlainn de chruthan-tìre Ratharsair agus an Eilein Sgitheanaich a thogadh le mac a bhràthar, Cailean MacIllEathainn.

An cois an leabhair, tha CD de dh’òrain a bha measail san teaghlach air an seinn le nighean Shomhairle, Catriona NicDhòmhnaill.

Bu thoil le Acair taing mhòr a thoirt dhan a h-uile duine a bha an làthair, an dà chuid air an làrach agus air-loidhne. Taing mhòr dha Mark, Jo, Màiri Sìne, Iseabail, Somhairle, Gilleasbuig agus an teaghlach air fad airson an cuid taic.

Taing cuideachd do Urras Shomhairle, Urras nan Eilean, Tobar an Dualchais ~ Kist o Riches, Comhairle nan Leabhraichean, Gillebrìde Mac ’IlleMhaoil, Bòrd na Gàidhlig, Sabhal Mòr Ostaig agus Urras Brosnachaidh na Gàidhlig.

Mura d’ fhuair sibh an cothrom a bhith ann, no a choimhead beò, chì sibh clàradh den tachartas an seo.

Faodar Somhairle MacGill-Eain Na Bhriathran Fhèin a cheannach an seo.

Tha Acair air leth toilichte innse gun robh oidhche shoirbheachail aca aig Na Duaisean Litreachais 2023 a chaidh an cumail ann an Cottiers, Glaschu an-raoir.

Cha b’ ann a mhàin aon leabhar a chaidh ainmeachadh air na geàrr-liostaichean airson cuirm nan duaisean ach còig!

Chaidh Crann-fìge le Donnchadh MacGillIosa ainmeachadh an toiseach mar buannaiche Duais Chomann Gàidhealach Lunainn airson Leabhar Fhicsean. Chaidh Crann-fige fhoillseachadh san t-Samhain an uiridh. ‘S e cruinneachadh de sgeulachdan ghoirid a th’ann, an dà chuid sa Ghàidhlig agus sa Bheurla, taobh seach taobh. Choisinn Donnchadh Duais Leabhar na Gàidhealtachd le Crann-fìge san Òg-mhìos.

A’ togail a dhuais, thuirt Donnchadh: “Tha mi toilichte buannachadh agus toilichte gun do bhuannaich Acair grunnan dhuaisean cuideachd.”

Chaidh Na Stocan agus na Stùcan, air a sgrìobhadh le Julia Donaldson ach le eadar-theangachadh le Mòrag Stiùbhart, ainmeachadh air a’ gheàrr-liosta airson duais an Leabhar as Fheàrr do Chloinn/Òigridh. Gu mì-fhortanach, cha deach leotha air an oidhche agus bhuannaich Donaidh Dathach le Gwen Bowie.

‘S ann an uairsin a thug iad seachad Duais Ruaraidh MhicThòmais airson Leabhar Bàrdachd agus thog Catriona Mhoireach an duais shònraichte seo airson an obair mhòr a rinn i ann an Doras gun Chlàimhean a chruthachadh. Seo a’ chiad cho-chruinneachadh dà-chànanach de dhàin is òrain Mhurchaidh MhicPhàrlain, Bàrd Mhealaboist, à Leòdhas a chaochail ann an 1982. Ann an Doras gun Chlàimhean gheibhear bàrdachd air cogadh agus eilthireachd, dùthchas agus dualchas, cho math ri cànan agus feallsanachd, le beagan fealla-dhà a’ togail ceann bho àm gu àm; tha a’ mhòr-chuid den bhàrdachd air eadar-theangachadh dhan Bheurla airson a’ chiad uair. Cuideachd anns an leabhar airson a’ chiad uair, tha cruinneachadh de sgrìobhaidhean eile leis a’ bhàrd; seanchasan agus litrichean, anns a’ Ghàidhlig agus anns a’ Bheurla. Cluinnear guth sònraichte a’ bhàird a’ seinn taghadh de na h-òrain aige air clàr a tha an cois an leabhair.

Tha Doras gun Chlàimhean gu làidir a’ daingneachadh cliù Mhurchaidh MhicPhàrlain mar bhàrd, mar sheanchaidh agus mar fhear-coiteachaidh na Gàidhlig san fhicheadamh linn. Is iomadh ulaidh luachmhor a tha a’ feitheamh air gach neach a thèid tro dhoras phrìseil Bàrd Mhealaboist.

Thuirt Catriona: “’S e urram mòr a th’ ann an duais seo a bhuannachadh gu h-àraidh is ainm Ruaraidh MhicThòmais co-cheangailte ris. Bha Ruaraidh gam theagasg san oilthigh agus tha mi fìor dheidheil air a’ bhàrdachd aige fhèin. Tha min dòchas gum biodh Murchadh air a dhòigh glan leis an urram.”

Bha dà leabhar Acair air an ainmeachadh air a’ gheàrr-liosta airson Duais Dhòmhnaill Meek airson Leabhar Neo-fhicsein; Cha Till Mise le Ruairidh MacIlleathain agus Gun Sireadh, Gun Iarraidh le Ceana Chaimbeul agus Ainsley Hamill.

‘S ann mu dheidhinn conbhoidhean dhan Ruis aig àm an Dàrna Cogadh a tha Cha Till Mise.

Tha an leabhar seo ag innse ann an doimhneachd mu na cunnartan agus mun chruadal a dh’fhuiling seòladairean nan conbhoidhean dhan Ruis. Agus, mun ghaisgeachd a bha ri fhaicinn ann am Blàr Muir Bharents, a’ mhadainn ud ann an 1942.

Tha Gun Sireadh, Gun Iarraidh mar phàirt chudromach de chultar nan Gàidheal agus e na chruinneachadh de dh’òrain Frangaig Tolmaich. ’S e co-chruinneachadh beairteach a tha seo, oir chaidh an ceòl agus na faclan a chruinneachadh o na daoine san tuath agus chaidh an clàradh cruinn còmhla le tè a bhuineadh dhan Eilean Sgiathanach aig an robh an dualchas agus na comasan àraid ud. Bha na sgilean seo gann ann an eachdraidh co-chruinneachaidhean ceòl nan Gàidheal.

‘S iad Ceana Chaimbeul agus Ainsley Hamill a shoirbhich air an oidhche agus iad air Duais Dhòmhnaill Meek a thogail airson an obair, nach gann, a rinn iad le Gun Sireadh, Gun Iarraidh.

Thuirt Aonghas Moireasdan, Manaidsear Acair: “Tha e na urram mhòr dhuinn an seo aig Acair gun robh leabhar sam bith air ainmeachadh air a’ gheàrr-liosta, ach gu h-àraid gun robh còig de na leabhraichean againn air an ainmeachadh! Cha bhiodh leabhraichean idir againn mur a biodh na h-ùghdaran a tha a’ sgrìobhadh na h-obraichean phrìseil seo no gu dearbh an taic a tha sinn a’ faighinn bho diofar bhuidhnean eile – leithid Comhairle nan Leabhraichean, Bòrd na Gàidhlig agus Alba Chruthachail.”

“Bu thoil leinn taing mhòr a thoirt do muinntir Chomhairle nan Leabhraichean airson an aithne a thoirt do na leabhraichean sgoinneil seo agus do na h-ùghdarran a bhan nan luib. Tha e cho cudromach gun tèid sgrìobhadh Ghàidhlig aithneachadh anns an aon dhòigh ri sgrìobhadh Bheurla agus tha sinn a’ faicinn barrachd is barrachd leabhraichean dà-chànanach a’ soirbheachadh.”